Animal Cafe GO!日本動物Cafe圖鑑
日本動物Cafe成行成市,唔止貓貓狗狗,仲有刺蝟、蛇、熱帶魚、貓頭鷹甚至係鷹,海陸空三個願望一次滿足,梗有一間啱你心水!跟住編輯部橫行日本動物Cafe,儲齊動物全圖鑑啦!
動物Cafe點收費?
收費種類其實同香港差唔多,有啲係按逗留時間收費,有啲係要order食物或者飲品。按逗留時間收費嘅話,通常一開始就要交第一節費用,完咗之後再睇情況可唔可以加鐘,人客比較多嘅話可能就要離開。
同動物玩有咩注意事項?
同動物互動主要可以分為睇、摸、抱同埋餵食,唔係間間Cafe都可以比你做齊4種互動,最緊要就係接觸動物之前要先消毒雙手,同埋一定要聽從工作人員指示,先至唔會整親小動物或者自己。就算玩得興奮,亦要記住控制自己聲量,尤其係爸爸媽媽一定要睇住自己嘅小朋友,太細個嘅可能等佢大一啲再去動物Cafe會比較好。另外就係如果可以影相嘅話,都要記得關閉閃光燈,唔係隻隻動物都可以頂得順強光㗎!
我想帶埋小朋友去動物Cafe,唔知得唔得呢?
通常動物Cafe都會歡迎家長帶小朋友嚟認識各種動物,不過小朋友玩到興起可能會尖叫,或者動作比較粗魯,甚至喺店入面跑嚟跑去,呢啲都係需要制止嘅行為。如果小朋友太細個,仲未識控制行為嘅話,可能就唔係咁適合,可以等大個啲再去。最重要係家長要陪喺小朋友身邊,教識佢哋正確同小動物相處嘅方法,小朋友亦可以學識點樣對另一條小生命負上責任。
萌力1000%刺蝟大本營
HARRY Cafe開張不久隨即爆紅,除了六本木總店之外現在在原宿亦有兩間分店,地點就腳,隨時可以上樓親親可愛刺蝟。店內採取計時制,入場時要先購買30分鐘消費券,30分鐘後如果店面並不擠擁可以加鐘,免費飲品同樣是自助服務。每一天刺蝟們上班之前也會有工作人員逐隻檢查,確保牠們健康快樂,才會送到客人桌上,不會要狀況不佳的刺蝟與客人接觸,相當體貼。
同刺蝟玩你要知
雖然店內蝟日日見慣大場面,不過不想滿手損傷離場,就有以下幾點要留意。抱刺蝟之前要先用酒精為雙手消毒,然後輕輕從刺蝟柔軟的肚子下方將刺蝟逗起,輕輕托在手上,放輕動作才不會嚇怕刺蝟。如果怕痛還可以戴上店內提供的手套,小朋友來玩就要由大人睇住先好同刺蝟接觸喇!
HARRY Cafe
地址:東京都澀谷區神宮前1-13-21 Shanzeru原宿2號館4/F
電話:03-3404-1180
營業時間:12:00pm-8:00pm
定休日:年中無休
收費:每30分鐘1,400日圓
交通:JR原宿站徒步約1分鐘
網頁:http://www.harinezumicafe-harajuku.com/english/