標籤: 超抵

有時候突如其來想食一餐超滿足、超罪惡嘅晚餐，唔少人都會選擇放題，而當中最能夠令食肉獸心動嘅當然係罪惡感滿滿嘅「燒肉放題」！最近日本燒肉店牛角，其中3間分店推出期間限定5款超抵食燒肉放題月票！不過由於月票反應太熱烈，推出兩日後已經賣清！到底燒肉放題月票有幾抵？一齊嚟睇下啦！ 每次見到油脂分佈均勻嘅雪花肉片，然後將佢哋放上啱啱烘好嘅網面炭爐，聽住佢發出滋滋聲，再配上一口暢快清爽嘅啤酒，真係能夠令人煩惱盡消～由於單點燒肉嘅消費一般比較高，因此對於食量大嘅朋友嚟講「燒肉放題」絕對係食肉獸嘅福音！雖然放題相對上係比較抵，但由於肉嘅來價始終較高，所以燒肉放題一般都要 300、400 蚊起跳，質素比較好嘅燒甚至要 500 - 800 蚊起跳，有時候都幾傷荷包！ 不過日本燒肉店終於聽到大家嘅心聲啦！日本牛角竟然推出「一個月燒肉放題月票」，只需要比一個價錢，就可以喺一個月內、每日一次無限次享用燒肉放題～優惠一推出，唔少日本網民表示震驚！ 月票只售 ‎¥‎11000 （港幣約$788），只要買咗呢張燒肉放題月票，一個月內就可以瘋狂享用燒肉放題啦！呢個價錢，大概只要食兩、三次就已經可以輕鬆回本，更何況係一個月內無限任食呢？難怪優惠一出就即刻被搶購一空！