標籤: 宮崎

前兩日同學仔去完綾城、青島，到咗第三日行程，佢地就黎到宮崎縣嘅北端繼續旅程，今日嘅行程好值得參考，除咗可以睇到其中一個日本三大秘境、仲可以了解到日本歷史同見到馬賽克森林添！睇下同學仔嘅遊記點講啦： 喺宮崎遊學團嘅第三日，我哋嚟到高千穗地區嘅諸塚村和椎葉村，欣賞世界農業遺產珍貴之美，呢度亦同時係平安時代末期一個關於源氏和平氏之間愛情故事嘅發源地。 宮崎縣高千穗鄉・椎葉山地區於2015年被列為世界農業遺產，範圍內有百分之九十六都係山林，居住地只佔百分之四，其餘就係公路。 諸塚村係當日首個目的地。呢個山林地區最大特色係佢地嘅「馬賽克森林」(馬賽克就係我地廣東話「格仔」嘅意思) 。點解個山林會被形容為「格仔」呢? 由於山上分佈咗唔同類型嘅樹種，佢地會隨住季節同氣候變化出唔同顏色，一片山林形成深淺不一嘅色塊，肉眼睇就好似打咗格仔咁，所以就被稱為「馬賽克森林」。 森林裡面主要有三種樹木，分別係做木材用嘅針葉樹、用黎種菇嘅落葉廣葉樹同埋當柴燒嘅純綠廣葉樹。三種樹木都係本地原生品種。當地林木栽種多數係以家庭為單位進行，村內種植樹木和菇類嘅歷史可以追溯到近1600年前，呢種家庭式小型栽種方法亦係形成「馬賽克森林」嘅主要原因。 諸塚村観光協会地址:883-1301 Higashiusuki-gun,...

一班同學揀係冬天去日本，就梗係唔少得滑雪行程啦~不過今次佢地就唔係咁好彩，遇上大風雪，但原來就算遇上風雪，去滑雪場都可以以有好多野玩架，最重要係要順應教練嘅指示，下次如果滑雪遇上風雪都唔洗灰心，一樣可以玩得盡興！不過當然，如果情況真係唔許可，教練都反對嘅話，就試都唔好試！ 第四日嘅行程由早上九點左右由旅館出發，大約一個鐘車程就到達目的地——五瀨高原滑雪場。滑雪場位於宮崎縣同熊本縣交界嘅高山地區，到達滑雪場嘅時候落緊冷雨，風勢後來逐漸增大，仲變埋做大風雪。雖然天氣不穩，但亦無阻我哋滑雪嘅心情。 我哋更換滑雪裝備後就徐徐坐纜車上山。滑雪場嘅登山纜車係果種只有扶手，雙腳懸空嘅款式，風雪之中大家都捉實扶手唔敢郁，上山途中遇上突如奇來嘅強風仲會令纜車停頓幾十秒至一分鐘，真係又緊張又興奮。到咗山上面，強風雪令我哋企都企唔穩，後來得知當天遇上日本宮崎數十年難得一遇嘅風暴，所以有好多旅行團都取消咗滑雪場嘅預訂。我哋喺山上面只見到另外兩三位遊客，仿如包場。由於強風沒有減弱，教練決定我哋先去進食午餐。出奇地，作為呢個山上滑雪場唯一一間餐廳，料理價錢實惠外亦十分美味，尤其是烏冬及牛肉飯，全部都係一千円有找！有啲同學更無懼寒冷天氣，竟然走去食雪糕！ 大約一點左右，我們終於可以走出去外面踏上雪地啦！由於我哋大多數都係初學者，所以我哋分為三組，跟著教練嘗試喺雪地上學習步行同埋用鞋嚟滑雪。大家一個接一個慢慢滑行落山坡，看見同學們由起初腳步蹣跚到動作變得順暢，真係十分佩服、自己都玩得好開心！