前兩日同學仔去完綾城、青島,到咗第三日行程,佢地就黎到宮崎縣嘅北端繼續旅程,今日嘅行程好值得參考,除咗可以睇到其中一個日本三大秘境、仲可以了解到日本歷史同見到馬賽克森林添!睇下同學仔嘅遊記點講啦:

喺宮崎遊學團嘅第三日,我哋嚟到高千穗地區嘅諸塚村和椎葉村,欣賞世界農業遺產珍貴之美,呢度亦同時係平安時代末期一個關於源氏和平氏之間愛情故事嘅發源地。

宮崎縣高千穗鄉・椎葉山地區於2015年被列為世界農業遺產,範圍內有百分之九十六都係山林,居住地只佔百分之四,其餘就係公路。

諸塚村係當日首個目的地。呢個山林地區最大特色係佢地嘅「馬賽克森林」(馬賽克就係我地廣東話「格仔」嘅意思) 。點解個山林會被形容為「格仔」呢? 由於山上分佈咗唔同類型嘅樹種,佢地會隨住季節同氣候變化出唔同顏色,一片山林形成深淺不一嘅色塊,肉眼睇就好似打咗格仔咁,所以就被稱為「馬賽克森林」。

森林裡面主要有三種樹木,分別係做木材用嘅針葉樹、用黎種菇嘅落葉廣葉樹同埋當柴燒嘅純綠廣葉樹。三種樹木都係本地原生品種。當地林木栽種多數係以家庭為單位進行,村內種植樹木和菇類嘅歷史可以追溯到近1600年前,呢種家庭式小型栽種方法亦係形成「馬賽克森林」嘅主要原因。

諸塚村観光協会
地址:
883-1301 Higashiusuki-gun, Miyazaki, Japan
諸塚村大字家代3068番地(しいたけの館21内)
電話:
+81 982-65-0178
網址:
www.morotsuka-tourism.jp

聽完導賞員對諸塚村嘅相關介紹,我地一行人喺村內香菇館享用全菇宴,之後轉到附近嘅椎葉村遊覽。據說,椎葉村五千年前就已經有人居住,但到1933年後先至有道路連接外界,俾外面嘅人能可以坐車入嚟椎葉村。

鶴富屋敷係椎葉村內最著名嘅景點,佢係一座有三百幾年歷史嘅傳統和式大宅,代表住日本平安時代末期兩大家族後人:源氏那須大八郎平氏鶴富姫 之間嘅愛情故事。因為兩家人嘅敵對關係,呢度亦係日本源、平兩家後人通婚嘅罕有例子,喺1956年更被日本政府被列為國家重要文化財產。源氏同平氏本為兩代天皇賜給庶子嘅姓氏,分別喺關東及關西地區發展。之後源氏、平氏因爭權開戰,平氏喺1185年壇之浦之戰被打敗,其後源氏展開追殺。1191年,源氏那須大八郎黎到椎葉村追殺平氏,遇上平氏公主鶴富姫,當時那須大八郎認為平氏對源氏已無任何威脅,亦同情平氏落難公主嘅遭遇,便放棄追殺,更與鶴富姫共墮愛河、結婚生子。不過,那須大八郎之後被源氏召回,留低已懷有源氏骨肉嘅公主,兩人約定若生女就將女兒留係村內,生男就由源氏帶走。最後公主誕下女兒,母女留於村裡,後人一直傳到今日並繼續打理鶴富屋敷。

鶴富屋敷
地址:宮崎県東臼杵郡椎葉村上椎葉
椎葉村観光協会 TEL:0982-67-3139
入場費:大人200円 小童100円
開放時間:9:00-17:00

唔好以為椎葉村地方細細,旅遊資源非常豐富,我哋仲去咗鶴富屋敷旁邊,依山而建嘅「椎葉嚴島神社」,仲去埋只要十分鐘車程就去得到嘅「椎葉水壩」同「日向椎葉湖」。先講椎葉嚴島神社,吓!嚴島唔係喺廣島附近架咩?呢間椎葉嚴島神社絕對唔係「山寨貨」,因為嚴島神社供奉嘅正正就係平氏嘅守護神,平氏公主既然留守椎葉村就當然要供奉返平氏嘅嚴島神社諸神,所以就建成咗呢間椎葉嚴島神社。

話說宮崎縣椎葉村同岐阜縣白川鄉以及德島縣祖谷山一齊被稱為日本三大秘境。究竟「秘」係邊度?當地村民話如果喺濕度高同日夜溫差大嘅季節,朝早就有機會係椎葉水壩、日向椎葉湖上面見到雲海,有如仙境一般,今次剛剛唔啱季節,唯有下次再黎過啦。

椎葉嚴島神社
地址: 宮崎縣東臼杵郡椎葉村大字下福良1822
諮商: 椎葉村觀光協會TEL:0982-67-3139

*行程由Asian Studies HSUHK 提供