2020年日本櫻花季開始啦~今次就想同大家分享長野県嘅賞櫻景點中綱湖，由於交通唔太方便，所以遊客都好少，可以舒舒服服咁係度賞櫻，唔洗同人逼（不過小編諗今年應該度度都唔多人了。。。）而且唔少攝影發燒友都會得登黎影相，因為佢真係靚得太過份啦～～～
中綱湖同青木湖、木崎湖並稱仁科三湖，其中中綱湖係最細嘅，係湖邊嘅一排櫻花加上背後翠綠一片嘅樹林形成一幅美麗嘅圖畫，唔怪之得每年5月都會有人不惜山長水遠去賞花。
中綱湖其中一個特色係佢嘅湖面波平如鏡，所以除咗地上有櫻花，水面上都可以完完整整咁反射出櫻花嘅倒影，而且係天氣好嘅時候，不論係日頭定夜晚都有不同嘅風鏡。唔少攝影師都會係度捕捉月下嘅中綱湖，皎潔嘅月光下，係一片泛白嘅夜櫻，直到天濛光嘅時候湖面集結住一層薄霧，我諗仙景就係咁嘅感覺啦！
呢度附近有一啲可愛嘅民宿同小旅館，想要更悠閒地欣賞呢一番美景嘅話可以考慮係度住返晚架！
除咗中綱湖，仁科三湖中嘅青木湖都係一個好好嘅賞櫻地點，仲可以睇到遠處嘅白馬山脈，但湖面就無中綱湖咁平靜，少左天空之鏡嘅奇幻感，不過呢度離中綱湖只需要約１０分鐘車程，強烈建議將佢排埋入行程入面啊～
