NO.3 – Barbecue Terrace Ablaze

平台180度全景 – 唔一定要去到最高層至有靚景睇,今次帶大家去市區激罕開揚平台餐廳,有畏高症嘅人都唔使驚喇!御台場希爾頓酒店內嘅餐廳Barbecue Terrace Ablaze位於三樓平台位置,盡覽東京灣景致,彩虹大橋就在身邊,日間有海風輕輕吹過,晚上可見彩虹大橋與東京萬家燈火互相輝映,最難得係由左至右一百八十度都無其他高樓大廈阻擋,視野極之廣闊。望住天空由湛藍一片漸變成紫紅晚霞,配上城市壯麗景觀,淨係望景已經回晒本。

餐廳主打燒烤,環境氣氛唔會太拘謹,適合三五知己聚會,傾得興起都唔怕會嘈親隔離啦!

雖然位置接近東京灣,時有海風吹過,但夏天都會比較熱,秋天就剛剛好,帶件外套擋擋風,大嘆新鮮熱辣嘅美食,話咁快就成身都暖晒。同其他餐廳一樣,平日下午價格稍平,相差約1千yen左右,但呢度始終係夜景較值得推薦!

地址:東京都港區台場1-9-1御台場希爾頓酒店 2F
電話:03-5500-5580
營業時間:平日 12:00nn-4:00pm,5:30pm-10:00pm
週末及公眾假期 11:00am-4:00pm,5:30pm-10:00pm
交通:東京臨海新交通臨海線台場站直達
網址:http://hiltonodaiba.jp/restaurants/ablaze

異地燒烤樂

餐廳以燒烤作主題,提供多個套餐選擇,包括沙律﹑各款肉類及海鮮,全部食材經過大廚嚴格挑選,套餐份量甚多,可以選擇同朋友一齊share,另外再單點其他心水食品,嚟到日本都可以輕鬆燒嘢食。夜晚一份套餐約6500日圓,價位尚可接受。另有甜品套餐,包括玉桂蘋果金寶﹑朱古力香蕉墨西哥薄餅等特色甜品,如果純粹想同朋友望靚景閒聊,嘆吓小食﹑甜點就啱晒,而且一set三千yen有找,認真抵食~

餐廳另一特別之處在於食材以無煙炭火燒熟,唔怕會沾滿一身油煙味,食都食得盡興啲!


NO.4 – YOKOHAMA MONOLITH

橫濱夜景之最 – 已經望厭咗東京鐵塔?橫濱夜景應該可以畀到啲新鮮感你!YOKOHAMA MONOLITH可遠眺橫濱海灣大橋同大棧橋碼頭兩大橫濱地標,一踏進餐廳就見到藍天與海灣形成嘅絕美景象,無論日間定夜晚都同樣震撼。餐廳整體裝修雖然採用深啡色系,但係別具心裁嘅燈光設計令室內環境變得明亮兼具現代感。

餐廳交通位置超便利,距離櫻木町站大約1分鐘步程,附近有多個人氣景點如摩天輪﹑大型購物商場等等,一次過感受橫濱魅力所在。

精緻如畫美食

除咗食材新鮮,餐廳亦特別注重將表現出「食材之美」,同時帶畀大家味覺同視覺上嘅享受。一上菜就被精緻的擺盤所吸引,每道菜式都經過精心擺設,醬汁與食材的形狀﹑顏色互相配合,尤如一幅幅簡潔有力的畫作,唔相機食先又點對得住落足心機嘅廚師呢?

地址:神奈川県横浜市中区桜木町1-1-7 TOC Colette Mare 17F
電話:045-663-1788
營業時間:平日 12:00nn-8:00pm,週末及公眾假期 10:00am-8:00pm
交通:JR櫻木町徒步約1分鐘
網址:http://produce.novarese.jp/yhm/


NO.5 – Top Of Shinagawa North bar

一人賞景無難度

位於品川王子酒店最上層,可眺望地上人來人往﹑車水馬龍的繁忙景象,亦能望見遠處的東京鐵塔。

晚上氣氛具格調,靠窗位置的桌椅面向窗外,一個人來到都唔怕要望住對面陌生人眼光光,可以全情享受眼前難得美景。雖然係酒店嘅酒吧,但唔少日本人都會喺放工後上嚟飲返杯輕鬆一下;環境情調咁浪漫,當然亦係情侶談心嘅好地方,所以就算唔係住客都一樣可以自由到訪~

輕食酒吧 – 除咗各式酒類飲品,呢度仲有高質手沖咖啡提供,唔飲酒都有其他選擇。如果傾傾吓計見肚餓,又或者一場嚟到想醫埋肚至走,亦有各種輕食如三文治﹑蛋糕可點,但價格平均稍高。

地址:東京都港區高輪4-10-30 品川王子酒店 Main Tower 39F
電話:03-5421-1114
營業時間:7:00am-10:00am,11:30am-3:30pm,6:00pm-11:00pm
交通:JR品川站徒步約2分鐘
網址:http://www.princehotels.co.jp/page.jsp?id=23567