作為一個日日呻地鐵好逼嘅港女,點估到有地方可以令自己變鐵道迷!講緊嘅係位於秋田縣小坂町嘅小坂鐵道鐵軌公園,佢翻新自原小坂鐵道的終點站--小坂站,於2014年6月正式開業,令早於2009年廢線的小坂鐵道得以用另一種形式重生。

咁大個鐵道公園,有返啲舊車票同舊零件畀大家睇吓是常識吧。
原為行走於上野至秋田‧青森的寢台列車「AKEBONO」,現作為展示車輛及住宿設施擺放於園內,價錢同膠囊酒店差唔多,揀上舖仲可以睇星星,也算是一個特別的體驗。

車站保留了明治時期風貌,而園內則展示了多輛大正至昭和初期用過的列車,擺明打造成鐵道迷朝聖之地,但若以為只係咁樣已足夠令港女變身鐵道迷,則未免太傻太天真。

敞大的園內有數條長約600米的路軌任人闖進,首先已經過到影相呃like呢關,另外更有踩路軌單車、乘坐觀光小火車等多元化體驗,起碼唔係得個睇字咁悶!而園內最大賣點是可以親身上陣體驗開火車,由退役駕駛員喺隔離傍住,開住柴油機關車或除雪車行走約100米路程,其中駕駛除雪車體驗更係全國只此一家,除咗能夠實現唔少鐵道宅的夢想,就連小編都聽到心癢癢囉!

價錢同膠囊酒店差唔多,揀上舖仲可以睇星星,也算是一個特別的體驗。

在路軌上奔馳不是夢

成條路軌任你行,沿路除可欣賞曾繁榮一時的小坂站風貌,更可看到部分展示車輛。

前面提過嘅駕駛體驗價錢由5,000日圓起,收費不菲,如果只係想過吓癮、體會吓喺路軌奔馳嘅快感,推薦必玩「路軌單車」。每架路軌列車設有兩個「駕駛席」及兩個「乘客席」,玩法同踩單車一樣,最重要係就算唔識踩單車都玩到,只要對腳掂到個腳踏就無問題!出發後自路軌上瞭望前方,廣闊風景完全無車廂阻隔,撞啱當日更天氣晴朗略帶微風,生活壓力甚麼的都隨著奔馳快感瞬間消失,玩完後略嫌10分鐘實在太短!

以往小坂鐵道主要用作除雪的TMC200型車輛被改裝成觀光小火車,大人細路都可乘搭。
唔打算參加駕駛課程,都可以上去呢架DD-132柴油機關車度扮吓車長,入面有設有前後兩個方向嘅司機位,以DD13型號來說相當罕見。


行得郁嘅紙皮車!

從靚仔外表上完全睇唔出係紙皮車,估唔到內有乾坤!
無呃人,真係全部都係紙皮整架!

園內雖然有咁多架列車,但最得女士們歡心嘅肯定係呢架的骰可愛嘅EVOLTA紙皮車!紙皮車由Panasonic同秋田縣立大學共同開發製成,用上特殊紙皮製作,並以99粒EVOLTA 13A乾電池作驅動能源。

2014年誕生之初曾經由大館市嘅舊雪澤溫泉站行到去舊御成町,距離都有成8.5公里,相信係日本人至會玩到咁癲!

紙皮車雖然有提供乘搭體驗,但就只限最多10位小朋友,大人唯有影吓相當搭過啦。

  • 小坂鐵道
  • 秋田縣鹿角郡小坂町小坂鑛山字古川20-9
  • 9:00am-5:00pm

  • 星期二及星期三(若星期三為假期則翌日休息)

  • JR十和田南站轉乘往「小坂」方向的秋北巴士,於「小坂小學校前」站下車,徒步約2分鐘