幻覺嚟嘅啫,嚇我唔倒嘅!

阿媽教落:「耳聽三分假,眼看未為真」,將這句至理名言套用到錯視藝術就最適合不過。雖然立體錯視藝術流行已久,不過小編依然覺得台場Trick Art Museum有無窮新鮮感,事關博物館難得地以江戶為主題,將江戶風情揉合於現代繪畫之中,有藝術味洋溢的傑作、也有搞鬼有趣的展品,全部均由人手繪製,巧妙地大玩錯視效果,栩栩如生程度叫人嘖嘖稱奇。而且展館今年4月才剛完成翻新工程,場地更大展品更多。現時館內總共收藏著54件展品,幅幅精彩得叫人不知從何著手,得意忘形起來,真的隨時一個下午都不夠時間拍照!

一切都是視覺開的玩笑

新作品之一的「餅屋」,學埋江戶人七情上面整年糕就更加生鬼啦!
颱風威力大到人仰馬翻,唔通係因為李氏力場失效?

雖然3D藝術館並唔罕有,但台場呢個真心唔頹,最過癮係館內滿佈隱藏機關與小房間,非常緊扣忍者與妖怪主題!小編溫馨小提示,記住因應作品風格擺多幾個表情交戲,出嚟效果會更加生動,仲要留意門框高度,唔係就會好似小編咁撞上矮門真係痛到喊出嚟…

善用遠近法,成個人騎上恐龍背脊都不是夢!
小心機關忍者屋內有忍者埋伏!要扮被忍者捉個正著,只需安躺地板就可以輕鬆拍得呃like照。
成個人匿藏喺佈景後方,一秒即變無頭東宮,得咗。
就算係同一幅畫,用唔同角度睇都會出現截然不同構圖,令人忍唔住望多兩眼。

雖然場內處處影相位,但始終只屬購物商場其中一層,因此建議連同其他鄰近景點一條龍直落。例如可以早上先到前文提到的Beach Island Mall醫肚,下午影夠相後再轉戰周邊地方,要排足一日充實行程毫無難度。而且入場費僅需1000yen,影返幾十張相已經值回票價,係一家人共同創造美好回憶嘅好去處!

「吸血鬼的點心」係最受歡迎作品之一,吸like必影! – 有冇人可以救我出去呀?

Tokyo Trick Art Museum
地址:東京都港區台場1-6-1 DECKS東京Beach Seaside Mall 4/F
電話:03-3599-5191
營業時間:11:00am-9:00pm
定休日:不定休
收費:成人1,000日圓、小童600日圓、3歲以下免費入場
交通:東京臨海高速鐵道東京電訊站徒步約5分鐘
網頁:http://www.trickart.info/

 

留下回應

輸入你的評論
輸入你的名字