全日本只此一家的室內笨豬跳,驚嚇程度絕不比在戶外玩輸蝕。參加者坐上鞦韆後會被「半天吊」雙腳離地,準備開展一趟飛越森林之旅。過程中一時急墮瀑布底、一時遇上森林動物,鞦韆反覆上昇下降,十足現代版泰山。加上面前還有風扇營造強風效果,又有離心力不時突襲,是場內尖叫聲此起彼落的刺激度No.1之選!

驚嚇度:★★★★★ – 畢竟鞦韆會郁上郁落,玩之前記住細閱安全守則以策安全。

警報!VR旋風吹襲澀谷

要數近期日本最炙手可熱的潮流玩意,VR敢認第二無人敢認第一。各地的VR主題樂園如雨後春筍般湧現,身為潮人嘅你又點可以錯過!要玩齊最hit虛擬體驗,小編首推座落澀谷中心的VR TOKYO PARK。園內一共設有8款遊戲,款款上癮度十足,要逃離現實生活、將憂愁面孔憂愁內心拋棄真係話都冇咁易,難免90分鐘時間限制實在係畀人一種「到喉唔到肺」嘅感覺,所以今次就等小編身先士卒,為大家精挑細選當中5個必玩遊戲,等各位可以善用每分每秒玩盡每個角落!順帶一提,過程中少不免郁動,因此最好身穿方便行動的服飾挑戰喇!

職員略懂英語,遊戲介紹也輔有英語解說,溝通不成問題。戴過VR眼鏡後即可開始遊戲。
為確保個人衛生,所有參加者在戴上VR眼鏡前都要先鋪上紙眼罩。
驚嚇度:★★★★☆ – DIVE HARD VR – 要一嚐當荷李活動作片主角的滋味,就一定不能錯過。玩家要化身特種部隊搭升降機至大廈天台殺敵,然後再行出「懸空」幾十層樓高的狹窄工字鐵迎戰終極Boss,完成任務後再跳上直昇機逃脫。千祈唔好以為在平地玩就無驚嚇位,事關要喺半空進行槍戰其實都幾腳震,睇見需要職員從旁協助就知有隨時會差錯腳!既要克服畏高,又要顧住與敵人博鬥,難度一啲都唔低!
驚嚇度:★★★★☆ – Salomon’s Carpet 繼續係考平衡力的射擊遊戲。今次則需要赤腳站在地氈上飛越沙漠,逐一擊倒迎面飛來的魔物。遊戲進行時地台會不斷搖晃,兼且又要不斷左閃右避,十分講求敏捷度。遊戲最大特色係輛以4D官感體驗,例如成功射中魔物會有震感、「飛行」過程中會有大風扇營造強風撲面效果、又會有水模仿魔龍噴氣,臨場感十足!
驚嚇度:★★☆☆☆ – T3R Simulator – VR PARK上月新鮮出爐的模擬賽車。各位可以幻想自己係藤原拓海於賽道上風馳電掣,一邊享受360度無障礙視野。VR不單只連上車落車場境都有模擬到,只需識得踩Break同扭軚就可以當正自己係專業賽車手,而且揸車速度都有返咁上下,座席又會跟住郁,係爽嘅!

VR PARK營業時間最夜去到接近凌晨12點,日頭要血拼觀光的朋友可以趁夜晚返酒店前玩個盡興。努力早起趕及平日早上的首個時段入場亦不失為一個良方,朝早較少人排隊之餘,亦只有呢個時段可以玩足100分鐘,足夠玩多一個遊戲!另外也建議先上網預約,確保能夠順利入場之餘,重點係預約可以每人平400yen,慳埋又可以食多餐好西啦!

場內設有貼心的汽水任飲服務,即使嗌到喉乾都可以立即補充水分。
驚嚇度:★☆☆☆☆ – 對戰!HACHAMECHA STADIUM VR – 不考運動神經或棒球規則,只考瘋狂揮棒擊球的能耐。有別於一般棒球比賽,職員會從旁指定電腦投出多種變幻魔球,甚至中途消失的都有,上演一場超現實的VR棒球體驗。而且周邊亦仿照棒球場佈置而成,被兩部大電視包圍,有一瞬間小編都覺得自己做咗棒球明星。

VR TOKYO PARK
地址:東京都澀谷區宇田川町13-11 KN澀谷1大廈4/F
電話:03-3461-1311
營業時間:平日、星期日及假期10:00am-11:25pm、星期六10:00am-11:45pm
定休日:年中無休
收費:事前預約 即場購票平日 2,900日圓 3,300日圓週末及假期 3,300日圓 3,500日圓
交通:JR澀谷站徒步約5分鐘
網頁:http://www.adores.jp/vrpark/en/


一飛衝天去

要玩 Skysdiving 呢項極限運動以前一定要室外至玩到,但依家竟然喺室內都可以玩得到?位於琦玉縣 Aron Lake Town 嘅 Flystation 就可以玩到啦!𥚃面設有一個高19.8米、直徑4.5米嘅巨型風洞,您可以喺𥚃面體驗到 skydiving 開傘前時速200公里嘅真實墜落感,真係會玩到面容都扭曲埋!呢到會提供埋裝備之餘,初學者仲會有導師一對一進行指導,而且風洞底亦設有安全網,真係做足安全設備。另外4歲以上嘅小朋友都玩得,想一家大細黎個 skydiving?其實唔難!

小朋友或者大人都可能會因為畏高而唔夠膽玩skydiving,喺到玩就一定無有怕啦!
雖然無年齡限制,又有經驗豐富嘅導師喺隔離磅住你,但係體重就唔可以超過120kg,咁重點吹得您起?
風洞夠哂大夠哂空曠之餘設計上亦好具未來感,雖然稱唔上係真正嘅skydiving,但無疑都係一種享受嚟!

FlyStation Japan
地址:埼玉縣越谷市 Lake Town 6-19-3
電話:03-4530-6100
營業時間:9:00am-10:00pm
定休日:年中無休
收費:視乎內容而定,請詳參官網。
交通:JR新習志野站徒步約11分鐘
網頁:https://flystation.jp/


 

留下回應

輸入你的評論
輸入你的名字