大家好,我係阿榮。

早排有朋友介紹咗個識講廣東話嘅日本人俾我識,嘩!!!!!識講廣東話嘅日本人(以下我叫佢做日本人A)喎!!!!其實真係好少見!!!

雖然佢啲發音唔係好標準,但都算流利同對答如流!!!

同佢傾開計先知原來佢係開公司教日本人廣東話嘅!!!!!!

太厲害了!!!!佢話上堂會請香港人老師去幫手,咁我就話你得閒可以叫我去幫下手㗎!!(好似好好玩咁)

於是乎,識左兩個月之後,佢終於叫咗我去幫手上堂!!!!

我上嗰堂呢,學生只係得三個(咁都明嘅,話晒廣東話點會有咁多人學吖),而學生都係上咗年紀嘅太太~佢地嘅程度只可以講到好簡單嘅句子同單字,自我介紹都難難地……

呢個興趣班嘅教學方法唔係由文法講起,係以我同日本人A傾計為多,咁當然係用廣東話傾啦,咁日本人A就得閒翻譯下畀啲學生聽,同埋介紹下啲生字咁~

咁樣嘅教學方法有冇用我唔知,但係我就覺得幾開心!!!因為可以聽到好多日本人對香港嘅想法同喺佢哋眼中香港有咩魅力!!!

其中兩位太太係因為鍾意張國榮所以開始學廣東話,特別係鍾意哥哥主演嘅電影,基於我本人都鍾意哥哥嘅,所以都傾得幾開心。仲有一位學生佢後生少少,鍾意謝霆鋒,我真係而家先知原來謝霆鋒係日本都有市場!!!嗰位學生仲話未見過有男人會好似佢咁美。而日本人A就鍾意劉德華,佢仲推介我睇〈暗戰2〉(佢話一定要係2喎)同寒戰!!!喺呢個時候,我就推薦左周星馳嘅戲,有位學生話佢都花咗一段時間先識欣賞周星馳嘅戲,咁都係嘅,有啲野係廣東話先有嗰種神緒,翻譯咗做第2個語言就硬係冇左個種精萃、少咁啲野咁,令我再次覺得自己講嘅係廣東話要感到高興與自豪!!!

喺呢個興趣班仲有好多令我覺得出奇嘅新鮮事,下回再分享!!

最後給大家一張我最近成日去食,係大阪開嘅香港餐廳~

分享
一個普通平凡的香港人,二十五歲時決定隻身遠赴日本工作,目前於鄉郊之地努力奮鬥中,所經歷之事被認為有點慘情(好似係)。並非勵志故事,純屬胡言亂語。