大阪漁港擦 500 yen 漁師丼

去日本食海鮮係指定動作,但如果去大阪只識黑門市場的話就走寶了!今年 2 月新開張的中之島漁港係本格魚市場,集日本各地水產於一地,北至北海道內漁港,南至鹿兒島串本野漁港,每日新鮮運到。最大特色係一般魚市場海產大都已劏好或作過初步處理,而中之島漁港卻有大量游水活魚活蟹供應,遊客都可以即買即劏即食刺身!

到晚上中之島食堂的上層座位會有燈槽滲光,配上市中心晚燈景色、吹住海風食海鮮感覺浪漫,係一個理想晚餐地點!

如若懶得自己揀只係一心想食海鮮填肚,旁邊就有中之島食堂,可以超抵價食刺身、壽司及海鮮丼,必食之選有 900 yen 大大碗漁師丼,魚生粒鋪滿整個碗,胃口較細嘅朋友隨時食唔晒。逢星期二漁師丼更會特價 500 yen 酬賓,但代價係肯定比其他日子擠逼,想行得舒服啲還是食平啲就要自己取捨啦。若然唔愛生冷亦可選 BBQ,有扇貝、大蝦、魷魚等海鮮亦有雞肉、牛舌、腸仔等肉類,照顧唔同朋友口味。


鹿兒島鰤魚 / 時價

呢條鰤魚如果做刺身足夠 10 人食用,一大班 friend 嚟開刺身 party 都得!

問到師傅推介有無好介紹,師傅就推薦鹿兒島鯖魚。由於鯖魚很易變壞一般都會腌漬,但在這裡就可以即劏即食刺身,入口先是彈牙有嚼勁,然後才漸漸軟化,甘香魚油慢慢滲出,每一啖食感都有變化。


超抵 1,000 yen 三盒刺身

雖然中之島漁港一大賣點係游水海鮮任你揀,不過總唔係個個都識揀識睇,可以放心係漁港內亦有供應已經料理好的刺身,有鰤魚、鯛魚、元貝、三文魚等多種選擇。最抵係標價 380 yen 刺身全部任揀 1,000 yen 三盒,大阪唔少上班族甚至會專程嚟買三盒刺身做早餐!

海鰻 / 680 日圓

香港想食靚鰻魚唔易,海鰻就更加少見,不過海鰻不宜生食,最貼近做法是以水焯完食用。海鰻帶獨特鮮香,油分適中,未試過就要試試啦。

漁師汁 / 隨漁師丼附送 / 單點 300 日圓

魚味鮮甜香濃,湯汁入口幼滑,不過附送的未見大件魚塊,可能要散叫才有如此服務吧。

燒鯖魚壽司 / 600 日圓(半份),1,000 日圓(全份)

鯖魚燒得剛剛好不會老或「鞋」,抹上醬油後味道十分下飯,叫全份當 main course 都不錯!

BBQ 如果懶得諗食咩可選套餐,有齊扇貝、蝦、肉及蔬菜都只係 2,000 yen 一位。

漁師丼 / 900 日圓

漁師丼沒有固定配方,由漁港選出時令鮮魚豪快角切即成。魚生沾上適量醬油,飯底則是醋飯,鹹鹹酸酸的味道使得生冷海鮮亦十分開胃。負責試味的 Model Hana 就表示「好新鮮,真係好新鮮,除咗新鮮我都唔知點形容!」

大阪雖然係海港都市,但可以爽快食海鮮的魚市場卻不多,加上中之島小小地方已可食到來自日本全國各地的海鮮,是以漁港開幕初,大阪上下幾乎為之瘋狂,每日都大排長龍。現今情況則較為好轉,只要係平日較早時間去到都唔怕人逼,可以慢慢揀靚海鮮靚刺身。

  • 中之島漁港

  • 地址:大阪市西區川口 2-9

  • 電話:06-6581-3315

  • 營業時間:中之島漁港 6:00am-5:00pm,
    中之島食堂 11:00am-3:00pm,5:00pm-10:00pm

  • 休日:不定休,詳見官方網頁時間表

  • 收費:免費

  • 交通:大阪市營地下鐵阿波座站 8 號出口徒步約 10 分鐘

留下回應

輸入你的評論
輸入你的名字