大家好,我係阿榮。
人地成日都話日本係縱式社會,公司入面大細尊卑分得好清,係既係啱嘅,但唔知係我間公司特別定我啲同事厲害,我發現佢哋同我所認識嘅日本公司有啲唔同⋯⋯⋯

我而家係喺大阪一間中小型嘅廣告公司度做AE,老細係一位中年女性,幾nice嘅,實幹型,而同事就有男有女,大家都好nice好強,日日無極限咁OT,當中有一位年資最耐,做左大約五年嘅女同事(我哋叫佢Y小姐),我真心打從心底佩服佢……點解??因為佢成日都好夠疆咁同我老細開片!!!!例子如下:

有一日老細去咗印度出trip返嚟,同Y小姐講開手頭上嘅project

老細:Y小姐,呢度係咪錯咗呀?
Y:無錯呀。
老細:點會呢?之前唔係咁講㗎喎個客。
Y:係你去印度嗰陣個客同我講要改。
老細:咁你唔同我講嘅?我已經叫咗Z(公司designer )去整喇喎。
Y:你可唔可以唔好鍾意就插隻手埋嚟,你咁樣搞到好亂!

我聽到呢句我簡直係心臟都冒汗呀!!!!!!!
嘩真心第一次聽到下屬對上司講真心話,仲要喺成村人面前!!!!!喺香港我都唔敢啦,仲話係日本!?!?!!??!
好彩老細都唔執輸,話:Y小姐,請你注意一下你嘅態度。
然後下兩秒可以完全無脾氣咁同另外嘅同事笑笑口咁講公事。
喺嗰一刻我又打從心從心底佩服老細嘅EQ,因為俾著係我,實黑面至少半日!!
好神奇嘅係,唔使半日Y小姐同老細可以好似啱啱無事發生咁閒聊。

呢啲場面經常喺我公司度發生,我而家都見怪不怪,無再心臟流汗了,不過嗌完交又唔傷感情(好似係),其實都幾好吖!!

最後給大家一張我第一次負責統籌商品攝影嘅相。

分享
前一篇文章東瀛道歉思考藝術
下一篇文章日本創業文化看日語教學
一個普通平凡的香港人,二十五歲時決定隻身遠赴日本工作,目前於鄉郊之地努力奮鬥中,所經歷之事被認為有點慘情(好似係)。並非勵志故事,純屬胡言亂語。

留下回應

輸入你的評論
輸入你的名字