辭咗職搬咗屋玩咗排後,終於開始我嘅求職日子。喺日本揾工,真係要經過重重考驗,首先你要好似喺香港JOB_B、RECU_T呢啲網站揾下有咩工,揾到就透過啲網站SEND CV出去,但佢地通常都要你寫篇叫做「志望動機」嘅嘢,即係叫你寫吓點解想入呢間公司,咁呢個時候你就先要起間公司底,然後再讚到佢哋天上有地下無,接住又講吓自己同間公司有幾夾咁…每次諗到要寫志望動機就頭痕,成日都花好多時間寫!!!除咗志望動機麻煩外,有啲傳統日本公司到呢個世紀仲係堅持以前嗰套,係都要人手寫CV寄去!!!原因係話想表達求職者誠意,我諗大家喺日劇入面都見過吓啲人寫履歷書嘅場面,真係寫錯一隻字都要重新寫過!!!!!!!!有啲履歷書仲要有個位叫你寫文,就例如志望動機…救命,我真係試過寫到最後兩行,先發神經寫錯一粒字…真係一隻字咋!!!!於是就要由頭再抄過…

此外,日本有好多求職agent會幫你手,我自己都有申請,佢哋好似中間人咁幫你揾工send CV,改志望動機,仲不時send 啲scout email畀你,問你有無興趣呢份工咁,所以我而家個email基本上全部都係呢啲scout email,哈哈日日都真係十幾封囉!Send CV只係第一步,之後要經過佢哋嘅「書類選考」,即係就咁睇你CV就決定你合唔合格,in唔in你,我聽agent講,書類選考過關嘅只係得30%咋!!!過咗書類呢part後就到重重面試,嘩唔好講笑,日本面試真係in好ABCDEXYZ多次!!!至少一定兩次先,有啲公司要三次,仲唔係大公司先咁做,基本上所有公司都係咁樣in人,講真,真係精神折磨嚟,我都有啲有趣面試經驗,下次再同大家分享!!!

分享
前一篇文章碳酸生活
下一篇文章日語教本VS課堂
一個普通平凡的香港人,二十五歲時決定隻身遠赴日本工作,目前於鄉郊之地努力奮鬥中,所經歷之事被認為有點慘情(好似係)。並非勵志故事,純屬胡言亂語。

留下回應

輸入你的評論
輸入你的名字