做隻沒有腳的小鳥

一講新潟,大家唔係講係風景靚,就係話佢嘅米同酒正,但其實新潟仲有一個隱藏版景點 — 就係湯澤中里滑雪場喇。如果以為滑雪場淨係有得滑雪,咁少年你未免太年輕了,其實每逢4月到11月上旬,滑雪場都會開放指定園區,舉辦名為「Forest Adventure」的活動,參加者可以參加獨木舟、攀爬架及繩網等項目,而當中最受歡迎嘅就係飛索(Zipline),畀大家試做「無腳嘅雀仔」!場內設有5個不同程度嘅飛索course,最難一關飛索高度更達到15米,少啲心理準備都會震晒腳呀!不過就算第一次玩都唔使煩惱要揀邊個course,事關只需3,700yen就可以順序由最簡單路線玩到最高level,而玩飛索前沿途各有不同任務要大家通關,包保用盡你所有體力。留意場地指導員嘅英文水平就同古天樂啲普通話差唔多嘅,所以請記得要帶備曉日文嘅小伙伴一個喇!

基於安全考慮,正式開始玩之前會有專人示範同簡單試玩機會,以免有任何損傷。
由出發到「正式啟航」,中間設有唔少任務等你通過!
飛往繩網陣時離心力比玩飛索更大,而且繩網陣係眾多任務中最難同最辛苦嘅,少啲毅力都唔得。

湯澤中里滑雪場 Forest Adventure
地址:新潟縣南魚沼郡湯澤町土樽5044-1
電話:025-787-3301
營業期間:2017年4月29日至11月5日(逢周末及公眾假期)
營業時間:9:00am-5:00pm(Zipline體驗至3:00pm)
交通:JR越後中里站徒步約8分鐘
網頁:http://www.yuzawa-nakazato.com/
收費:體驗 Adventure Course Canopy Coures
成人 3,700日圓 2,700日圓小童※1 2,700日圓※2 2,700日圓
※1 小童需有成人陪同方可參加※2 小學4年級以上方可參加


越後湯澤魚樂無窮

而家天氣炎熱,飛完天,就梗係要下吓海啦,我哋去咗同樣位於湯澤町嘅湯澤Fishing Park,嚟個summer夏水禮!Fishing Park顧名思義當然係同魚有關,不過如果叫你喺呢度釣魚,又未免普通咗啲,但如果話係捉魚你又點睇呢?喺呢度可以體驗喺水池捉魚,捉完之後仲可以即時燒嚟食添!建議阿爸阿媽可以帶小朋友嚟呢度玩捉魚,小朋友有佢哋玩,你哋又可以坐埋一邊放鬆吓,生活壓力即刻消失又得,立即消失又得,得咗!

去吧!北信越三縣海陸空必玩體驗
捉到魚之後,會有專人教你點燒同調味,地獄廚神都唔使驚!
終於捉到魚,其實要食到燒魚,都真係唔易。

湯澤Fishing Park
地址:新潟縣南魚沼郡湯澤町大字土樽6191-512
電話:025-787-3911
營業期間:預定直至11月上旬(期間無休)
營業時間:9:00am-5:00pm (10月中旬後改為 8:30am-4:30pm)
收費:入池費:30分鐘/ 200日圓、魚:300日圓/條
交通:JR越後湯澤站乘車約10分鐘
網站:http://www.yuzawa-fishingpark.com/


煎餅王國新體驗燒仙貝!

新潟米嘅好食程度相信大家都唔陌生,今次推介嘅正係利用新潟米製成嘅烤仙貝!作為日本第一仙貝產地的新潟縣,縣內的「新潟仙貝王國」就提供了烤仙貝的體驗活動。點解叫「王國」?因為單係新潟縣嘅米類製品,就佔全日本生產量五成,「煎餅王國」之名當之無愧!呢度除咗可參觀仙貝製造過程,仲可以親手嘗試自己燒仙貝。最開心係燒完更可發揮自己創意,喺仙貝上繪畫屬於自己嘅圖案同文字,令佢成為獨一無二嘅紀念品。體驗工場旁邊亦有大量手信販賣,例如米粉咖哩麵包、煎餅雪糕等等。下次到新潟的時候,不妨考慮將煎餅體驗放在行程內吧!

Step 1 – 以醬油將仙貝翻轉翻轉再翻轉!
Step 2 – 自行畫上鐘意嘅圖案或文字。
Step 3 – 於烤爐上方40cm烘烤,令圖案浮現。
Step 4  – 塗上少許醬油,然後等待風乾。
完成品 –  將燒餅風乾便完成!仙貝包裝後大概可存放一個月左右,自己留念抑或作手信送人都一流!
親身嘗試過烤仙貝之後,覺得過程都得意好玩,雖然對住個烤爐半個鐘真係有啲熱,但整體而言都是相當值得推薦。

新潟仙貝王國
地址:新潟縣新潟市北區新崎2661
電話:025-259-0161
營業時間:9:30am~5:00pm
定休日:全年無休(有臨時休息日)
收費:免費入場,超特大烤仙貝體驗1,500日圓
交通:JR新崎站徒步約20分鐘
網頁:http://senbei-oukoku.jp/

留下回應

輸入你的評論
輸入你的名字