大家好,我係阿榮。

早嗰排,我去咗九州旅行,遇到四個香港人,令我印象深刻。

第一次去九州㗎咋我,但我反而唔係玩福岡呢啲大城市,我去咗佐賀入面嘅山卡啦地方,啲電車要成一個鐘先一班,令我諗返起上年喺石川生活嘅日子,諗到有啲想喊(想知上年發生咩事,詳情可睇返我個FB page哈哈)。

咁啱我去嗰三日兩夜都落大雨,打風嘛,好打唔打,三連休先嚟打風,講起都興!!!事情係咁嘅,嗰日我推住個細喼,要由一個叫武雄嘅地方搬去一個叫唐津嘅地方,因為落大雨關係,啲班次都亂哂又推遲哂,所以我用手機apps查嘅班次完全唔準(因為日本啲電車班次路線太複雜喇,所以平時出街都要用專用check電車班次嘅apps)。

由武雄去唐津要轉一次車,落車嗰陣得我同埋前面一堆太太,我哋不約而同咁行咗去另一個月台,咁啱嗰度有架電車等開出,但目的地唔係我要去嘅唐津,咁我咪左望右望囉!我眼尾睇到嗰堆太太都好迷糊咁樣睇手機又望嚟望去。出名八嘅我梗係聽吓佢地講咩㗎啦!!!一聽,喂!!!!廣東話喎!!!!!!個月台得我同佢哋,我知佢哋最後實會走嚟問我路⋯⋯⋯⋯嗱⋯⋯真係啊⋯⋯⋯行緊過嚟喇⋯⋯⋯下一秒,其中一位太太就隊個手機俾我睇但又唔出聲⋯⋯⋯⋯我:「廣東話吓嘛?」太太立即陶大宇心花放咁講:「係啊!哈哈!!」跟住我就同佢哋研究係咪呢班車,同問車長點去唐津喇!

途中同佢哋傾咗陣計,佢哋話佢哋嚟九州玩九日,我問佢哋點解要去唐津呢啲山卡拉啊?佢哋話想睇個下港囉~佢哋又係咁問吓我做咩嚟日本啊,做緊咩工啊?小心啲啊﹑俾心機咁。之後我問使唔使幫你哋四個影張相啊,佢哋話「好啊!!!!!!」我諗呢咁多日佢哋都好少可可以四個人合照,所以興奮成咁!

咁中途我就同佢哋分開咗喇,但我想講嘅係,佢哋真係好可愛!!!!!!!

四位太太不諳日語,但自己獨力咁check哂手機查哂資料去埋啲無咩人會去嘅地方遊覽,好似去冒險咁!!!!!!!我好佩服佢哋啊,你話後生就唔怕事姐,但係佢哋到咗呢個年紀仲勇於靠自己踏出一步咁去其他地方度睇吓玩吓,呢種精神我真係好buy!!!!所以話呢,去旅行真係無分年齡㗎!!分分鐘啲長輩仲玩得癲過後生仔啊!!!

最後給大家一張佐賀牛嘅相,堅好味啊痴線!!!

分享
一個普通平凡的香港人,二十五歲時決定隻身遠赴日本工作,目前於鄉郊之地努力奮鬥中,所經歷之事被認為有點慘情(好似係)。並非勵志故事,純屬胡言亂語。