文青至愛 藝術大草原

平時拍拖去開博物館或圖書館嘅情侶,大商場未必合你哋心意,以下箱根雕刻森林美術館就一定滿足到閣下要求。

妖精的教堂 – 以妖精的結婚派對作主題建成,粉藍透明造型夠晒夢幻。細心一睇有如一層層晶瑩藍冰。

雕刻森林美術館故名思義,雖未至於設在森林裏,但置身大自然之中卻一點不假,極大草原上放置了多位西方現代雕塑家的作品,多個大大小小的雕塑座落在廣闊的綠茵廣場上,背後可見連綿山脈,欣賞雕塑同時呼吸大自然氣息,美術館內景色雖不算壯麗,但卻有種令人平靜安寧的神奇力量,適合唔怕悶、鍾意同大自然玩遊戲嘅情侶們漫步,悠閒度過一個下午。

除咗室外大草原,美術館設有五個室內展示場,展示多個雕塑館藏,另外更特設畢加索館,內有多幅珍藏畫作,畢加索迷可以大飽眼福。畢加索館旁驚見溫泉足湯,更不用付費,美術館話細唔細,走了大半天,貼心情人記得帶另一半來溫暖疲勞雙腿,此加分位絕對不能錯過!作為大型美術館,又點會少得餐廳及紀念品店?美術館面積超大,建議留足大半日時間參觀,早上先去室內展區參觀,順便留留倩影,下午在可望見大草原的餐廳用餐後繼續參觀餘下室內外園區,建議晏晝兩三點時間參觀「呼喚幸福之和諧雕刻」,午後陽光灑在花窗玻璃絕對令人一見難忘。臨走前記得買返件心儀紀念品,就算只係小小一個鎖匙扣都足以勾起充滿藝術及大自然氣息的難忘回憶。

The Hakone Open-Air Museum Café設落地玻璃,開揚感十足,主要提供熱狗等輕食。
可以在大草原上一次過欣賞到眾多巨型雕塑作品實屬難得。
必去高塔「呼喚幸福之和諧雕刻」內部,花窗玻璃經陽光透射,顏色更顯繽紛。
各雕塑座落在大平原上及水池,走一小段路就會遇上新驚喜,亦為此美術館叫人著迷之處。

晴朗天先出發!美術館有別於一般博物館,其魅力在於佔地極廣的室外範圍,所以出發前記得查清楚天氣預報,揀定晴朗日子先到訪!

彫刻之森美術館
地址:神奈川縣足柄下郡箱根町二之平1121
交通:箱根登山鐵道彫刻之森站徒步約2分鐘
營業時間:9:00am-5:00pm
定休日:全年無休
網址:http://www.hakone-oam.or.jp/


窮遊必去 免費東京全景

去到東京又點可以唔睇東京夜景,但慳家情人嫌觀光塔門票太貴?東京都廳幫到你!

東京都廳位於新宿,屬於日本政府建築,亦係新宿最高嘅摩天大廈,45樓設有南、北兩個展望台,視野一望無盡,飽覽東京兩方向全景,日落時份嚟到更為壯觀,而重點係展望台免入場費,唔似得東京其他免費展望台,呢度空間相當寬闊,假日多訪客都唔怕會迫爆,不過當然最好都係揀閒日嚟啦!另外留意展望台嚴禁使用三腳架,攝影達人就可能會比較失望,但身邊有人陪你一齊欣賞美景,影唔到靚相,自拍留低美好回憶都一樣開心姐~

望住醉人夜景談談心,簡簡單單都可以好滿足。

想一覽東京地標嘅話建議上南展望台,一次過望晒東京鐵塔、Skytree,天氣好時更可遠眺富士山!另一邊北展望台則有靚景餐廳,價錢以夜景餐廳嚟講唔算貴,慶祝重要日子一流!

去新宿除咗瘋狂購物,仲有猶如世外桃源嘅新宿御苑,鬧市中一個空曠又充滿日式典雅嘅公園。

 直闖職員飯堂,都廳內設職員食堂,訪客都可光顧,價廉味美,想一試嘅話建議閒日下午一點左右到,避開職員午飯時間。

東京都廳展望台
地址:東京都新宿區西新宿2-8-1
交通:JR新宿站徒步約10分鐘
營業時間:北展望台 9:30am-11:00pm,南展望台 9:30am-5:30pm
定休日:北展望台 每月第二及第四個星期一,南展望台 每月第一及第三個星期二
網址:http://www.metro.tokyo.jp/index.html


懶鬼之選 鬧市之中睇星星

如果另一半屬於文靜類型,對玩或者購物都無乜興趣,平日唔願出街,去旅行最期待就係返酒店瞓嘅話,帶佢嚟池袋「滿天」就啱喇。

白雲軟墊話大唔大,兩個人瞓剛剛好。館內稍凍,想做暖男嘅記得帶多件衫喇。

「滿天」位於池袋Sunshine City,採用新開發嘅光學式天象儀360度投射出多部星象作品,頭頂滿天星空,加上出色音響效果,就似飄浮在太空之中,感覺超治癒。館內除咗普通座位,另外特設「草地座位」及「白雲座位」,供兩人使用,可以瞓喺草地地氈或白雲大軟墊上,攬住小咕𠱸欣賞放映,relax到好似返咗屋企咁。放映作品大約有三套可選,內容包括壯觀星空、星象奇景或奇幻故事,可以事先上官網參考,有晒準備唔怕到時買飛估估吓!

如果自問係宅宅情侶,必去Sunshine City內的J-World,上完宇宙再投入動漫世界,度過超現實一日!

除咗天文館,Sunshine City內仲有水族館、展望台等其他休閒娛樂設施,去其他景點只需徒步唔使再搭車,加上美食餐廳隨處可見,hea足一日都唔會悶,一定可以滿足一眾懶人唔想郁又想行程豐富嘅願望。

水族館與天文館同層,行兩步就到下一個景點,車錢都慳埋。

唔識日文無有怕,雖然係星象作品係以畫面行先,但聲音導航可以令觀眾更易投入,部分作品提供英語導航耳機,買飛時可向櫃檯職員查詢。

「滿天」天文館
地址:東京都豐島區東池袋3-1-3 Sunshine City World Import Mart大樓屋頂
交通:JR池袋站徒步約20分鐘
營業時間:11:00am-9:00pm(最後一場放映8:00pm)
定休日:全年無休
網址:https://planetarium.konicaminolta.jp/manten/

留下回應

輸入你的評論
輸入你的名字