正所謂一白遮三醜,風景亦同人都一樣,白色世界總令人響往。但要喺香港過白色聖誕基本上無乜可能,唯有去日本滿足吓囉!北海道雪祭、立山黑部的雪之大谷相當出名,但同想像中嘅夢幻雪景似乎有一段距離,想尋找真正如童話國度般的雪景,難道要遠走歐洲小鎮?咁又未必,其實只要識玩,日本唔少秘境換上白衣後根本有如走進童話,要幾浪漫有幾浪漫!

粉紅色的櫻花跟橙紅的紅葉喺白雪襯托下特別惹人憐愛。

日本四季分明,櫻花及紅葉理應分屬春天及秋天,點會同雪景有關係呢?原來喺北海道及東北等天氣較寒冷嘅地區,間中會在季節交替時同時出現櫻雪相映或紅葉未落已積雪的情景,屬難得一見的珍貴畫面,就算特登去睇都未必睇到!


法式夢幻情懷 白川鄉

就咁睇相好難唔以為白川鄉係歐洲某城市,只因一座座舖上白雪的三角形合掌造十足聖誕薑餅屋,被雪山包圍的村落在晚上點燈後,更像極了法國阿爾卑斯山的Saint-Jean D’Arves,點會諗到咁靚嘅地方其實位於日本岐阜縣喎!作為日本現存少數合掌造村落,日間嘅白川鄉的確充滿古代和風,如同東北的大內宿般,保留了江戶風情。以茅草覆蓋屋頂的木造建築傳說源於13世紀初的平氏家族,能夠有效禦寒,而整成三角形屋頂亦絕非貪得意,而係為咗令積雪容易滑落、避免將屋頂壓垮。由此可見合掌造可以話係針對雪國嘅設計,亦難怪同白雪如此相襯!

要欣賞白川鄉最靚一刻必定要揀冬季點燈活動期間到訪,本來已經係童話世界代名詞嘅白川鄉,點燈後添上一片如夢似幻的藍色,從展望台俯瞰下去,甚至會覺得白川鄉並非現實世界。當然近年遊客大增,沿路遇著人多或嘈吵的情況,難免有破壞氣氛之嫌,但當抵達展望台一刻,白川鄉的浪漫卻有足夠令在場人士秒速收聲的震撼!

在群山包圍之下的白川鄉,令人想起宮崎駿筆下的風之谷-同樣的恬靜和平。
就連入口嘅「相遇橋」舖上白雪後都變咗幅畫!
白雪之中嘅啡色木屋,是典型童話世界的風景。

午後散策

除咗睇點燈,白川鄉本身亦係值得細看嘅世界遺產,所以一般人會於下午便前往當地遊覽。白川鄉內有多間手信店,另外亦有三間開放參觀嘅合掌屋,裡面可睇到合掌屋嘅構造,感受悠久的歷史。不過對於為食嘅朋友嚟講,更重要應該係呢度可以食到出名嘅飛驒牛呢!

走入屋內可以發現合掌造只由繩及木頭建成,完全沒有使用釘。

Editor’s Tips

白川鄉冬季點燈活動去年於一月中旬至二月中旬的周末舉行,而今年則暫未公佈,有興趣前往嘅朋友需留意官網消息。另外留意返點燈活動會於晚上6點至7點半舉行,如想即日來回可參加當地團或租車,時間許可則建議於當地民宿住一晚,更能體驗當地風情。

白川鄉
地址:岐阜縣大野郡白川村
電話:05769-6-1013(白川鄉觀光協會)
交通:從金澤、高山或名古屋轉乘高速巴士前往
網頁:http://lightup.asia/(Light Up活動)

留下回應

輸入你的評論
輸入你的名字