岩手 – 自駕遊賞楓黃金路線

這趟東北追楓之旅,划過獨木舟,試過鐵道遊,來到最後一站的岩手縣,係時候換上另一種玩法-自駕遊。既然選擇自駕遊,路線自然鎖定能越過高山的八幡平Aspite Line,一邊遊車河一邊欣賞具層次感的紅葉景色,咁至叫識嘆!八幡平Aspite Line位於八幡平國立公園內,連接秋田縣及岩手縣,全長約27公里,一路上可看到岩手山至八幡平等連綿群山,由山頂至山腳逐漸染成鮮紅及金黃色,景色遠較平地上的紅葉瑰麗壯觀。要留意的是八幡平Aspite Line山頂的楓葉由9月下旬已開始轉紅,而山腰、山腳的紅葉觀賞期則稍遲,基本上到10月下旬便落葉,所以都要下年請早了!路線上沿路會經過黑谷地濕原、見返峠等值得一看的景點,如果在中午時份前往,則可在山頂的餐廳醫肚。另外未出發前聽講過紅葉時期會較擠塞,但採訪當日正值賞楓最佳時期,道路上卻仍非常通順,行程安排上建議預留約兩、三小時。

途中設有停車場,不妨下車走進兩旁盡是楓葉的山林中慢慢散步,享受紅葉景色。
沿路的楓葉以金黃色居多,相較鮮紅楓葉感覺較治癒。紅葉觀賞期:9月下旬至10月下旬
除了有變紅的楓樹、山毛櫸等,山上也有綠色的青森椴松,白色的岳樺,形成豐富的層次感。

地址:岩手縣八幡平市八幡平國立公園內
電話:0195-78-3500(八幡平市觀光協會)
營業時間:24小時(4月下旬-5月下旬、10月下旬-11月上旬因夜間交通管制,5:00pm-8:30am不能通行)
定休日:期間中無休
收費:免費
交通:從東北道松尾八幡平IC經由縣道45號約20分鐘
網頁:http://www.hachimantai.or.jp/


人間最後的淨土

聽到寺廟一般只想起古色古香的建築,去得多難免有點麻木。所以當來到屬平泉文化遺產的毛越寺時,看見岸邊樹木完美地倒影在池水之中,猶如天空之鏡般的景象,真係當堂眼前一亮!原來這裡是依據日本最古老庭園書設計而成的「淨土庭園」,除了長達180米的大泉池外,四周更有沙洲、迎潮而立的石、假山等等,以襯托水池及樹木景觀。雖則庭園嘅嘢小編識條鐵,但當繞著庭園悠閒散步,望著靜止不動的池水,彷彿連時間都停止了流動,想到在香港也沒甚麼機會只對著山山水水,頓覺這裡確是一片淨土。

歷經800多年的庭園保留了眾多平安時代的庭園風格,讓人有如走進平安時代。
除咗以庭園聞名,其實毛越寺都係紅葉勝地嚟!紅葉觀賞期:10月下旬至11月中旬

地址:岩手縣平泉町字大澤58
電話:0191-46-2331
營業時間:8:30am-5:00pm(11月15日至3月4日 8:30am-4:30pm)
收費:成人 500日圓、高中生 300日圓、中小學生 100日圓
交通:JR平泉站徒步約7分鐘
網頁:http://www.motsuji.or.jp/


盛岡人龍燒肉冷麵店

嚟到盛岡唔試吓盛岡冷麵總覺得略嫌不足,幸好在盛岡站外已有一家高質冷麵店「盛樓閣」!盛樓閣不但供應盛岡三大麵類之一的盛岡冷麵,同時亦有燒肉食,當地人便習慣於大擦燒肉後點一碗冷麵收尾。店內的燒肉款式不算多,但牛舌、五花肉等入口軟嫩有餘,油脂適中,絕對屬中上之選。然而更多人來到都只為幫襯碗冷麵,周末到訪基本上排長龍!至於一碗冷麵何以咁巴閉,秘密就在於其湯底及麵條。半透明的粗身麵條遠較一般的拉麵彈牙有爵勁,食起上嚟相當過癮;而湯底酸酸辣辣十分開胃,加上雪梨後更爽口清甜,辣度可自行加入泡菜調節,明顯正中女士口味!

極上牛舌(鹽味)- 建議選鹽味,更能品嚐到牛舌本身的鮮味!
盛岡冷麵 – 湯底好清好易入口,就算飲完成碗都不覺滯。

地址:岩手縣盛岡市盛岡驛前通 15-5
電話:019-654-8752
營業時間:11:00am-02:00am
定休日:年中無休
交通:JR盛岡站徒步約2分鐘
網頁:http://www.gen-plaza.com/


半個鐘速製卡通饅頭

唔知大家有無邊個卡通人物係鍾意到想食埋佢落肚呢?如果有,就要去盛岡手作村嘅「菓子工房」啦!呢度只需500yen就可以跟住菓子職人學整可愛日式饅頭,做法更非常簡單,只要開工前先話畀師傅知想整邊個卡通,然後將已準備好嘅麵粉糰搓圓按扁、加入紅豆沙饀,最後畫上或貼上五官、髮型等就可以拎去蒸,成個過程不過約30分鐘,簡單到連家政零分嘅小編都無失手!饅頭完成後最好盡快食用,另外一場嚟到亦不妨逛逛手作村內其他工房,可以學整盛岡冷麵、南部煎餅等。

大大粒嘅黑眼珠同鼻哥係黑豆,而各種顏色就係用食用色素畫上。
於用作做「面」的麵粉糰內加入紅豆沙饀。
糰子 – 菓子工房內亦有售賣新鮮製好的糰子,可自由塗上醬油、芝麻醬等,更有機會抽中「再來一串」。

地址:岩手縣盛岡市繫字尾入野64-102
電話:019-689-2201
開放時間:8:40am-5:00pm(日式饅頭體驗只在周末及公眾假期舉行)
定休日:12月29日至1月3日
收費:日式卡通饅頭 每人 500日圓(1個)
交通:JR盛岡站轉乘巴士約30分鐘,於「盛岡手作村前」站下車即達
網頁:http://tezukurimura.com/main/


秋日抱抱大自然

秋天天氣咁好,唔去郊外玩返日真係對自己唔住!想在大片草地上碌來碌去,又或者親親小動物,甚至係落水癲喪一下,都不能錯過擁有百年歷史的小岩井農場!講環境,總面積達3,000公頃的小岩井農場實在無得輸,入到去毋須立即問呢度有乜好玩,索性先搵返赤子之心,喺大草地上放肆地跑來跑去,野餐又好、玩飛碟又好,感受一下無拘無束的自由,之後先再慢慢發掘呢度各種好玩體驗!

乘搭馬車 – 坐著懷舊馬車出巡,路途上可以看到好多綿羊仔。
水上波波  – 左搖右擺勁狼狽都無所謂,最緊要好玩!
小岩井布甸 – 材料用上小岩井農場的雞蛋,蛋香濃郁,口感勁滑勁creamy!

地址:岩手縣岩手郡雫石町丸谷地36-1
電話:019-692-4321
營業時間:2016年10月1日至11月18日 9:00am-5:00pm、2016年11月19日至2017年1月3日 12:00nn-8:00pm
收費:成人 800日圓、小童 300日圓
交通:JR盛岡駅轉乘往「小岩井農場Makiba園」方向巴士約30分鐘
網頁:https://www.koiwai.co.jp/

留下回應

輸入你的評論
輸入你的名字