一年轉頭又過,臨近年尾要清大假就係出遊最佳藉口!11月的日本東北,漫山紅葉是最大魅力,由山頂延綿至山腳的秋色,教人真正領略「飽覽美景」的意義,加上數不盡的地道美食、遠超想像中的動感活力…在踏入晚秋之際一於到東北走一轉,盡情睇、食、玩,實行幫自己充個靚電!

交通方法 – JR東日本鐵路周遊券(東北地區)

香港現時未有直航機去東北,所以大多數人都會選擇由東京出發,轉乘新幹線前往東北。以東京站出發為例,去岩手縣一之關市最快只需約2小時,而且班次頗多,大約每隔一小時就有一班車,其實比想像中方便喎!不過大家都知新幹線唔平,識玩一定係買返張「JR東日本鐵路周遊券(東北地區)」,一票在手即可任搭包括青森縣、秋田縣、岩手縣等使用範圍內嘅新幹線及普通列車等,從此唔使再為交通費計住計住,慳返腦力先真係叫充電之旅!JR東日本鐵路周遊券分為東北地區及長野新潟地區兩款,留意唔好買錯啦。

JR東日本鐵路周遊券(東北地區)
http://www.jreast.co.jp/tc/eastpass_t/


租車自駕遊

雖然搭JR已經去到大部分地方,但講到睇風景總有唔少紅葉勝地係要靠楂車先去到。而家喺日本租車自駕遊非常方便,不但可於網上申請、在不同分店租車及還車,而且出租車種類選擇夠多,人少少又或一大班人租都抵玩!租車後最好買埋張「Tohoku Expressway Pass」,使用日數可選擇2日至14日,日子越長除返開日數當然越平,購買後就可以任用東北地區高速公路,想去邊就去邊!張pass只限於指定租車公司租車方可購買,打算玩得至精明嘅朋友記得check定合作店舖啦。

Tohoku Expressway Pass – 導航系統有中、英文揀,新手自駕遊無難度!

Tohoku Expressway Pass
http://www.driveplaza.com/trip/drawari/tep2015/ch.html


青森 – 360度環迴飽覽紅葉

在香港也有紅葉,但跟日本的紅葉相比,則實在是小巫見大巫!來到日本本州最北的青森縣,即使要跳過其他所有行程,都值得將時間預留給十和田湖,選擇划著獨木舟出發,慢慢欣賞環抱湖畔的秋色。老實講,睇相就覺得「湖上泛舟」好浪漫,但實際上若閣下同小編一樣屬弱質纖纖小女子,初次划獨木舟相信唔夠幾分鐘已雙手酸軟,累得想早日上岸。不過秋日的十和田湖就是有一種魅力,吸引你堅持下去,當每走過一處地方都是不同的紅葉景色,不知不覺竟然划了一段距離,轉彎時看見層次豐富的遍山紅葉,更一時興奮過頭,不小心就弄得獨木舟頭搖又尾擺,好在有可靠的教練在身後掌舵,才不至於整個人掉進湖裡去!

紅葉觀賞期:10月中旬至11月上旬 – 無論划到哪裏,都逃不過紅葉的手指隙~
教練話自己唔多識英文,但依然好努力咁介紹十和田湖,值得畀like!
十和田湖的子之口連接另一紅葉名勝奧入瀨溪流,有時間當然去埋先好走。
湖水透明度極高,連湖裡的樹根都清晰可見。

地址:青森縣十和田市営宇樽部露營場 管理棟前
電話:0176-70-5977
營業時間:9:30am-11:30am、1:30pm-3:30pm
營業期間:4月29日至11月上旬
收費:1人 10,000日圓、2人或以上 每人6,000日圓
交通:JR八戶站轉乘往十和田湖方向JR巴士約1小時10分鐘
網址:http://www.nexgh.com/


十和田五花腩燒肉

划獨木舟前最好食返個豐富午餐補充體力,五花腩燒肉係十和田市B級料理代表,牛肉上舖滿大量洋蔥及甜辣醬油,炒香後餸飯確係一流。

牛肉吸收了濃縮的洋蔥清甜味,入口肉汁飽滿豐郁。

地址:青森縣十和田市大字奧瀨字櫪久保11-12
電話:0176-74-1121
營業時間:11:00am-3:00pm
營業期間:4月18日至11月24日(每年不同)
交通:JR八戶站轉乘往十和田湖方向JR巴士約1小時20分鐘,於「燒山站」下車即達
網址:http://www.aptinet.jp/Detail_display_00000340.html


浪漫滿屋 奧入瀨葫蘆燈

葫蘆同苔蘚本來風馬牛不相及,但有了創造力量同幻想,竟能鍊成浪漫又實用的奧入瀨葫蘆燈。離開十和田湖前往奧入瀨溪流館拜師學藝,找到的是一身「路易吉」打扮的「鍊燈師」起田高志。原來葫蘆燈的設計靈感源自奧入瀨溪流超過300種的苔蘚圖案,而由佢親自種直的葫蘆本身都係飲奧入瀨河水大,因此手作的葫蘆燈除了獨一無二更深具當地特色,實在無理由唔帶返香港做手信囉!

Step 1 – 揀選心水葫蘆後依參考圖樣在葫蘆上標記開孔處。
Step 2 – 以工具為葫蘆打上一個個小孔。
燈光透過小孔四散開來,柔和溫暖,很適合放在房間內呢!

地址:青森縣十和田市大字奧瀨字櫪久保183奧入瀨溪流館内
電話:0176-74-1233
營業時間:9:00am-4:30pm
定休日:星期二
收費:1人 3,500日圓(已包括材料費及導師費)
網址:http://www.mossball.jp/

留下回應

輸入你的評論
輸入你的名字