正宗港式茶餐廳插旗東京,短短兩年時間人氣由日本反吹中港台真心巴閉!支持贊記為港爭光是一件事,實際的起心肝幫襯又是另一回事。遊日本專程飲啖茶,食件撻,講笑咩?

「嚟緊贊記供應嘅,長住日本廿年都未必食過!」店主說來霸氣,就睇下有乜理由值得大家遠道而來。


贊記…下一步

香港地傳統茶餐廳逐漸走向式微是不爭事實,但有心飲啖靚茶,食件靚撻未算太難。贊記招牌作品相當傳統,正是打工仔日食夜食茶餐﹑蛋撻﹑碟頭飯…現場試食水準雖拍得上澳牛,個人定位屬路過好想食又未至專程幫襯級數,想吸香港遊客前路並唔易行,莫非贊記打算一招港日 Fusion 玩創新,亂搞乜乜魚子炒蛋﹑海膽厚多士之流?事實香港地綽頭行先一街都係,您仲未厭?其實吸引力唔一定需要次次新奇,贊記下一步力推晚市港式邊爐,用日本頂級食材配搭正宗港式風味路向清晰,至吸引是店主大拍心口指供應食材即使長住日本廿年亦未必食過,何況身在香港?店主豪邁說:「能夠一次過食齊日本最靚海鮮﹑頂級豬牛雞同時蔬,贊記好可能係日本第一間舖咁做!」嗯,新路向創意度零分又如何,香港無可能食到經已好夠綽頭。

品嚐日本最頂級

「好多人聽過 A5 和牛,事實正宗A5 和牛連日本人都未必食過,甚至喺邊度有得食都唔知!您話香港邊有可能食到!贊記嚟緊就有正宗 A5 供應。」據店主所指,東京有售正宗 A5 和牛地方僅止三處,其中高島屋有售的松阪牛約 8,000 日圓/100g,亦即約六百港紙一片肥牛,果真所言非虛,非人人食得起。「又唔一定要食貴嘅,簡單蒸個日本矮瓜都可以好好食。總之想食乜想點煮,早一日打電話嚟預約,直接講廣東話,我幫您攞新鮮貨!」頂級食材供應屬商業機密自不便透露,只知店主因緣際會獲本地供應商大力支持,而這一步邊爐計劃店主一心想益同鄉,希望港人有機會品嚐日本國內才有的頂尖食材。言談至此,待應從旁端上一盤地道蒜蓉蒸扇貝,扇貝肉足半個拳頭大非常誇張!「未見過咁厚肉嘅帶子?其實日本至靚嘅海鮮,坊間食肆唔會供應,即使長住日本廿年,甚至好多本地人都無機會食到日本最靚嘅鮑魚﹑蝦﹑蟹…贊記會有,甚至連日本海捉嘅鮟鱇魚一樣有得食。」價錢呢?詳細呢?事實上店主張生也未有詳細定案,只肯透露將於 10 月底供應,以予約制來確保材料日日新鮮。

蒜蓉蒸扇貝

日本食材,港式製法成件事有幾吸引?於我而言,食過店主特製蒜蓉蒸日本扇貝真係返唔到轉頭,何況私底鍾意打邊爐多於涮涮鍋,呢條橋我真心 Buy。


它…純屬意外

說罷新發展,贊記又有什麼舊故事?原來贊記誕生純屬意外,怎想到選址並沒半點商業考慮,只是三年前店主剛移居日本,某日重遊昔日留學打工地懷緬過去,碰巧遇上一棟未清拆舊建築臨時放盤,與當時苦尋居所的他一拍即合。50 年前兼職地竟成今時今日事業新起點,一切皆是緣。「最初打算下舖上居賣雜貨,又或者地舖收租直接退休過日子就算。」輾轉中港兩地餐飲業界,戎馬半生已年逾七旬的店主張生說。

最終促使贊記誕生因為對日本食材熟悉,與其做生不如做熟,遂萌生重操故業念頭。「做贊記係因為日本材料全世界最好!基本蛋糖已經靚過香港,種類選擇又豐富,單單豆腐已經十幾廿種,用日本火腿煮個通粉已經好食過香港,唔係我講,係好多客咁話!」張生回想贊記初開張,他坦言當時沒雄心,打算賣奶茶火腿通之類,只想賣最簡單的過過日晨,後來日本客在網絡一傳十,百傳千幕名而來,「一下子多左客幫襯,要對班食客有交待,當時好急好急求班舊拍檔嚟幫手,先有後來蛋撻﹑菠蘿包呢類地道小食俾日本人,估唔到佢地好鍾意!」


它…正宗嗎?

正所謂入鄉隨俗,家鄉菜喺外地設店好多時為迎合當地人口味,刻意調整味道稀鬆平常不過。日本人口味偏甜,贊記又有否堅持正宗?「點解要遷就先?反而應該將香港傳統甜酸苦辣味道教曉日本人知!總之堅持原汁原味,我地做嘅係真正香港口味,唔係中華料理呢類日本菜。」啱!開茶餐廳就該有這份骨氣,愛吃就來,不愛就給我走,絕不妥協,張生從 90年代開始經營茶餐廳逾廿載,香港到北京,再到東京,無論地方再變,炒蛋還是哪一份炒蛋,始終如一!這種貨真價實,明買明賣才是茶記真正形象,希望香港地苦苦經營的真茶記也能堅持這份骨氣。

手寫餐單佈滿店舖一角,相當老派茶記格局,反而香港地已經買少見少。
贊記只做脆皮蛋撻只因酥皮豬油太多,店主說脆皮大家都好接受。
奶茶跟足傳統做法,小茶飲落同香港完全無分別。
贊記亦有賣碟頭飯麵,咖哩既香且滑帶點辣勁,風味真心夠地道。
招牌茶餐用日本材料搭香港正宗煮法,單係炒蛋水準拍得住香港地出晒名嘅澳牛。

後記:它…沒有消費茶記

靜靜坐在卡位等待店主登場,抬頭一看張貼在牆上一張張手寫菜單,已想不起有多久沒光顧茶記?再揭一揭贊記餐牌更看傻了眼,價錢竟跟松屋相若,以日本消費而言相當超值;菜單是香港地正宗茶記最普遍的,坦白一點既沒花巧也沒創新,怎看也是一間四平八穩老派茶餐廳。我是打從心底欣賞這份純粹,沒多餘雜質,賣的是價廉物美,吃個飽轉身走人不就是港式茶記應有價值嗎?矛盾是今時今日香港地茶記十之八九不倫不類,若單論新鮮感與創意,誠意不可抹殺,像黑松露炒蛋﹑黑毛豬午餐肉撈丁不是不好吃,我只是不喜歡在披著茶記皮囊,實際是消費非街坊的貴價餐廳裡吃,感覺不對甚至不是哪回事…突然想起電影<<衝鋒車>>裡的對白「龜苓膏無龜,奶茶無奶…」,頗貼切。

期望花巧,給您耳目一新感覺,我相信贊記它不懂。可能他鄉遇故知,待應同聲同氣得咁好傾,同香港地無水洗面嘅待應無得比,呢個可能係贊記同傳統茶記最唔同嘅地方。

香港贊記茶餐廳チャンキーチャチャンテン
地址:東京都千代田区飯田橋3-4-1, 81 東京
電話:036-261-3364
營業時間:11:30am-07:00pm,星期日 11:30am-05:00pm
定休日:無休

留下回應

輸入你的評論
輸入你的名字