走進妙妙貓森林

貓cafe在港日兩地並不罕見,只不過無論開幾多間,都一樣吸引貓奴前往。而在今年4月,Yufuin Floral Village首間貓cafe終於開幕,位於Gallery Alice Tea Room內。講到《愛麗絲夢遊仙境》的貓就必然諗起妙妙貓,故cafe亦符合主題,取名為Cheshire Cat Forest,裝潢則以妙妙貓居住的森林為主題。除了以不少女生都喜愛的《愛麗絲》作賣點,cafe以10隻孟加拉貓做「侍應」,另外為有4隻貓星人bb,細細仔又眼大大咁,而且大部分都好痴人,瞬間萌殺各位貓奴!雖然佢哋真係好cute cute,但記得唔好隨意抱起牠們,除非貓星人主動親近,不然會嚇怕牠們呢!

孟加拉貓係咩來頭?金色毛髮加埋黑色斑紋,望落同豹有幾分相似嘅孟加拉貓,其實是由俗稱山貓或豹貓的石虎,與埃及貓雜交而生的品種。與石虎相比,孟加拉貓的個性較友善,亦較喜歡與人親近。

貓星人在草地上自由嬉戲,仲識追住鏡頭跑!

雖然開設了Cheshire Cat Forest,但Gallery Alice Tea Room依舊繼續營業。如同其名,cafe以《愛麗絲夢遊仙境》作主題,除了牆身放滿書中插畫,店內傢俱與裝飾均與《愛麗絲》有關,例如印著紅心Queen的啤牌餐桌等,全場極多影相位。除咗內裝連細節位都做足,餐點當然亦同樣落足心思,像是以意粉拼湊出白兔子的樣子。另外店內亦有不少可愛精品,無論你是《愛麗絲》迷還是貓奴,抑或兩者皆是,嚟到呢度一定超滿足,兼且唔捨得走!

在眾多金黃色的孟加拉貓中,還有一隻白色的,由工作人員特別照顧。
望住佢對圓碌碌大眼睛,加埋個無辜樣,個心即刻融化!
話明係「妙妙貓的森林」,除咗草地,又點少得樹木呢?

Gallery Alice Tea Room Cheshire Cat Forest
地址:大分縣由布市湯布院町川上1503-3 Yufuin Floral Village Hotel 1F
收費:成人及中學生780日圓、4歲或以上小童580日圓,包一杯飲料
電話:0977-76-5538
營業時間:10:00am-5:00pm


入鄉隨俗走和風Snoopy茶房

即使沒有看過《花生漫畫》,也一定認得裡面的白色狗仔Snoopy和他的主人查理布朗。原來外表可愛、造型多多的Snoopy也深得日本人歡心!早在2014年4月,Snoopy便帶著牠的朋友來到九州插旗,開設Snoopy茶房。為咗打入日本市場,Snoopy其實好識do,入鄉隨俗換晒和服兼化身成和風料理,務求令更多人認識佢,兼且拜倒喺佢嘅萌樣之下。

貴為全世界首間和式茶寮,由布院的Snoopy茶屋從外部便已花足心思。茶屋主要分成三個區域,首先為室外的雪糕小屋。若然沒有時間入內慢慢逛,買杯綠茶雪糕消消暑也是不錯選擇。不過嚟得囉,就梗係要入去朝吓聖!茶屋內部設有商店,甫進屋便有大大隻Snoopy坐在鞦韆上悠哉悠哉的迎接大家。商店內從公仔到小食都應有盡有,亦有不少在這裡才買到的限定商品,各位Snoopy fans預咗買到大出血!而食物方面,多款餐點全部睇得又食得,可愛得嚟味道方面都有保證。不過最緊要都係畀相機食先,用嚟打個卡呀嘛!睇怕fans嚟之前除咗儲定彈藥,仲要記得留返啲手機同相機嘅記憶體容量!

間隔上有多幅掛畫,將櫻花、和服等日本元素與Snoopy人物來個crossover,別具特色。
Snoopy抹茶Latte(冷/熱)抹茶味香濃,甜而不膩。而立體的Snoopy從Latte冒出頭來,淨係賣相已經加晒分。

超大Snoopy任你影!嚟到Snoopy茶屋,又點可以唔同主人翁影返張相先得㗎。窗邊的梳化放咗一隻半個人咁大嘅巨型Snoopy,無論你想高抄自拍,抑或攬實花痴,都一樣任影唔嬲!
熱香餅配雲呢拿雪糕連抹茶蕨餅 / 680日圓除了熱香餅上的忌廉和定番的雪糕,還附有彈牙的抹茶蕨餅,非常足料。
Snoopy漢堡蛋包飯 / 1,620日圓以本地蛋製成的嫩滑蛋皮,配上廚師親手調配的香濃牛肉汁,令人食指大動。
Snoopy兒童餐 – 除了主食和天婦羅、腸仔等配菜,還附有甜品和新鮮水果,非常豐富。
白玉善哉 -「善哉」其實是一種傳統和式甜品,以紅豆等豆類伴以砂糖煮成,並附有白玉丸子。

 

三色丸子 – 煙靭的三色丸子以糯米搓成,若嫌沒有餡料的丸子味道太清,可伴以旁邊的紅豆蓉食用。
Woodstock行司公仔  –  行司為相撲裁判,穿上行司服的Woodstock威風得嚟又帶點呆萌,都幾cute cute㗎喎!
罐裝仙貝 – 鐵罐上畫有和服打扮的角色,食完仙貝留返嚟放小物就最啱!

SNOOPY茶屋
地址:大分縣湯佈院市湯佈院町川上1524-27
電話:0977-85-2760
營業時間:商店 9:30am-5:00pm、餐廳 10:00am-5:00pm
網址:http://www.snoopy.co.jp/chaya/

留下回應

輸入你的評論
輸入你的名字