關東花火,真夏夜祭開催

七月,又到日本花火大會戰線!日本人每年不怕同人逼,在汗水與炎熱下越夜越精彩!未試過又想感受一下﹖不妨近近地由關東入手!由都心新宿去到近郊,密集高樓以至廣闊平地,原來日本煙花,可以這樣璀璨!


收費座位 VS 免費埸區

花火大會常會設有料席,有些只限當地人買飛,如隅田川花火大會就有只為當地人而設的付費會場。不過如神宮外苑花火大會,卻可在網上買飛,海外遊客都可參與盛事!而大部分大會均設免費劃位區,只要預先霸位就可坐擁靚 view!

神宮外苑的有料席,雖然無冷氣都一樣坐爆!

行行企企 VS 淡定霸位

在免費區域欣賞煙花,又分坐定定霸位同邊行邊睇兩種!河堤、草地或沙灘等公共空間,日本人通常當日一早以牛皮膠紙把帆布、地蓆固定,再寫名 mark 定位。但行人通道、馬路、橋樑和樓梯就不能預先佔用,只可在放煙花前後短暫停留!

日本人出名有秩序,霸好位就不會有人郁,可一早先去相關地方 mark 位,不用在會場呆等,然後放煙花前才回來!
至於霸位用品,花火大會期間不少便利店都有地蓆、牛皮膠紙賣,大可以放心!


自己煙花 自己玩!

香港煙花炮仗都唔準放,不過日本有得玩之餘仲種類超多!想過過癮,七、八月不少玩具、文具店都有出售。到河堤、草地,甚或穿上浴衣,同屋企人一齊玩就最開心!

手筒花火 – 搵手拎住似乎有啲危,不過勝在夠刺激!竹筒以麻繩卷起,可以燒約廿秒。
菊花牡丹 – 想「玩大啲」,可以飛上 20 米的菊花牡丹就最啱!不過要細路要家長指引至得!
線香花火 – 最傳統又易玩,因似參拜用線香而命名!線香花火外面以七彩和紙搓成,入面捲有火藥。

鳴謝:日本國家旅遊局(JNTO) © SUMIDA CITY 鎌倉市観光協会 ©箱根町

留下回應

輸入你的評論
輸入你的名字