日清呢舖黑歷史杯麵系列將於7月3日由地獄重返人間!將3款唔賣得嘅產品再次上架仲要全國發售到底係乜嘢玩法?日清就話要透過呢個系列將日清暗黑世界嘅杯麵重返人間,仲誠意邀請大家幫襯添!到底係人類總是犯同樣的錯,定係一次救贖,睇過先知!


伏爆杯麵1號 – 夏日冬蔭公味

呢款杯麵係1995年緊急限定發售嘅口味,即使完全唔知點解夏天同冬蔭公有乜關係,但據說就係宣傳語畫蛇添足加左句「レモングラス」令人誤解係檸檬味杯麵搞到無人幫襯…其實冬蔭公味一定無死嘅,點睇都唔係太伏姐。


伏爆杯麵2號 – 高湯天茶茶漬烏冬

2002打算食住日本人鍾意飲茶應運而生,點知日清捉錯用神,明明興綠茶就走去用焙茶做湯底,結果梗係賣唔去啦!今次來回獄又折返人間,日清話睇中呢期興飲高湯所以推番出嚟。嗱!呢期興飲鰹魚高湯喎…杯麵湯底掂唔掂o架…


伏爆杯麵3號 – 泰式大排攤甜辣醬炒麵

因為2001年熱帶海鮮杯麵大熱而趁勢喺2002夏天推出,日清就講番,原來衰在個封面無乜形容個口味,整棵椰樹+熱帶UFO幾粒大字意味不明,加上甜辣口味對當時食客而言太新,而家推出一定有吸引力咁話!其實唔知日本人口味,但對咁鍾意點泰式辣醬食雞翼薯條嘅香港人應該最啱,香港日清會唔會諗諗佢呢…

資料來源:日清食品

留下回應

輸入你的評論
輸入你的名字