大家好,我係阿榮。

唔經唔覺喺日本已經住左就兩年。

時間真係過得好快,有好多親朋戚友都會問我:「你鐘意喺香港住定係喺日本住呀?」

嗯……其實唔使諗深一層,我都會答喺日本。

唔好誤會呀,我都好愛香港㗎!始終根係嗰度生嘅,感情點都係濃厚嘅。但以客觀上嘅條件嚟睇,日本係好住啲嘅。首先,市區規劃得好啦,住宅同鬧區真係分得好清,而配套都好好,超市呀便利店呀總有一間喺左近,遠少少嘅咪踩單車去囉,幾健康!放咗工返到屋企真係好寧靜同舒服,唔使喺香港咁喺屋企樓下都可能要同人迫。咁又延伸到去第二點,香港真係好多人。日本鬧區都好多人㗎!以我住緊嘅大阪嚟講,心齋橋真係好表表者!我次次行親都忍唔住躁底!但係一遠離咗鬧區,去到住宅區,嗰種對比,嗰種平靜,真係好舒服!

第三點係比較主觀嘅,因為我個人鍾意去睇live聽音樂,以香港比較冇咁重視音樂文化,又加上某啲政治原因,有啲海外歌手樂團未必可以喺香港開show,例如我好鐘意嘅Radiohead 同Marilyn Manson就點睇都喺香港搞唔到show㗎喇!但係日本有各種fes同live,種類多元化,對於我嚟講係好重要嘅一環,你知啦,人工作都係為咗開心同滿足私人生活嘅需要㗎啫!所以我揀咗喺日本生活。

但係有陣時我都會覺得有啲位唔慣,例如,日本冇N車!!!!!!!呢個真係好傷!!!大佬啲地鐵最尾嗰班車十一點幾十二點就開,我呢啲加班到九點十點,有陣時同朋友同事食個飯唔夠一陣就一定要趕終電走人!!我每次嗰陣都會心諗,「如果有N車就好了!!!」
最傷嗰次係我返part-time(係,我除左返緊份正職之外仲返緊份part-time)放工都成十點幾,收工之後我同老闆去食少少嘢,跟住就趕尾班車返屋企,我去到車站,突然覺得有啲唔對路…………嗯?嗯……??嗯!!??!!??!

世界末日!!!!!我漏咗條屋企鎖匙喺part-time公司!!!!!!媽媽咪呀!!!!!

嗰陣十一點四十五分,尾班車十一點五十分開,我真係跑得快過小明都趕唔切返公司拎鎖匙再趕到尾班車!!!!!!最後,我搭咗四千yen的士返屋企,仲要搭到暈車浪但又不停畀個司機撩我講嘢!!!!

喺嗰一刻,你話有N車有幾好吖!!!!

最後給大家一張完全唔關事,但係我早排食嘅A5和牛。

分享
前一篇文章過勞死
下一篇文章新手媽咪全職湊B日記!
一個普通平凡的香港人,二十五歲時決定隻身遠赴日本工作,目前於鄉郊之地努力奮鬥中,所經歷之事被認為有點慘情(好似係)。並非勵志故事,純屬胡言亂語。

留下回應

輸入你的評論
輸入你的名字