鬼影幢幢 訪尋妖怪之家

步近境港站,真係著少件衫都覺得陰風陣陣,老衲屈指一算,就發現呢度妖氣沖天全因為一個陪伴我哋長大嘅人——鬼太郎。境港市係鬼太郎之鄉,係其作者水木茂嘅出生地,為咗紀念水木茂,境港市市內大部份嘅設施同建築都係以《鬼太郎》入面嘅妖怪為主題,仲有長達八百公尺嘅「水木茂大道」,街上滿滿都係形形色色嘅妖怪,千奇百趣都要畀十個趣啊!

香港出名滿天神佛,係多神論嘅地方,拜神真係普通至極嘅嘢,但拜妖怪對香港人嚟講可能就新奇有趣啲喇!喺水木茂大道嘅中心位置,就有一座妖怪神社,拜祭全日本嘅善良妖怪,好似《鬼太郎》裡面嘅牆壁怪同布先鋒等等。呢個神社喺2000年創立,唔經唔覺都已經有成十七年嘅歷史,而且有唔少人喺度祈求出入平安、愛情順利,都成功如願,證明善良妖怪真係會運用妖力幫人架!

不過,神社入面的確供奉住一舊妖怪石頭,傳說係當地社區重建嘅時候發現嘅,由黑御影石同櫸木組成,而最神怪嘅就係喺舉行儀式途中,居然跌咗一塊出嚟,水木老師更加煞有介事咁將佢命名為「目玉石」,你估呢嚿石頭係咪真係有妖力呢?

境港市周圍都係《鬼太郎》入面嘅場景同人物,如果「鬼迷」嚟到呢度肯定玩到唔想走!
由於鬼太郎爸爸鬼眼老爺係全套漫畫最有特色,而且係最受歡迎嘅角色,所以市內嘅設施好多都會以佢做裝飾。
嚟鬼太郎必定要坐妖怪列車,列車由米子站出發至境港,車廂內外都係鬼太郎嘅圖案,仲有六款不同嘅主題列車,但要搭以鬼太郎做主題嘅列車恐怕就要有啲運氣了。
境港站嘅候車室都係一大亮點,成班妖怪陪住你等車,都咪話唔爽!

妖怪村內有紀念品店,畀一眾「鬼迷」可以大買鬼太郎周邊!

妖怪神社
地址:鳥取縣境港市大正町 62-1
電話:0859-47-0520
休日:年中無休
收費:免費入場
網頁:http://www.yo-kai.net/