大家好,我係阿榮。

嚟咗日本住之後,都好少做啲咩嘢體驗日本文化咁,咁啱早排我個客為咗配合番佢件商品嗰種日本刀嘅精緻細膩嘅concept,特登請埋我同我哋公司嘅人,去京都某偏遠地方學整日本刀,順手住一晚,重點係有豪華和食食!!!!!!

我一見到個「豪華和食」呢四個字,我對眼已經發青光!!!!!!!立即報名話去啦!!!!!點知成間公司得我一個報名,全世界都覺得件事好麻煩,仲要同客去添!!!所以最後得我同社長,仲有四個客一齊同度「開心愉快」嘅難忘兩日一夜。

嗰日朝早返咗公司做咗半日嘢先出發去京都間旅館,會合咗啲客就出發去整刀喇!整刀嘅過程實在太複雜,我都唔太細講,但最記得嘅係用鎚仔揼到我哋六個人對手痛到食飯都拎唔到筷子!!!你睇吓,都市人就係咁㗎喇,郁多少少就頂唔順!!!!!冇計~

我哋整完自己把刀之後,仲有少少後期工作就交畀師父做,我地哋就返旅館開始漫漫長夜嘅聯歡之夜。

一嚟就梗係我期待已久嘅豪華和食啦!!!!!!!!!!!!!!!
點知,真係㗎,做人真係對咩嘢都唔好太大期望。個豪華和食同平時傳統嗰啲唔太同,佢係同西方料理mix埋一齊,有奶油湯飲嗰隻,然後啲份量少到呢⋯⋯我以為自己食緊法國菜,可能係我大食啦⋯⋯所以食完同咗個肥佬(最大嗰粒客)兩個去咗食拉麵!!!唔好講笑,第一次同大粒客兩個食拉麵你都咪話唔緊張呀大佬!!!!好彩同佢都算好傾啫~

另外,日本人真係好鍾意同工作上嘅伙伴飲到死了都要飲,食豪華和食嗰陣己經飲咗好多㗎喇大家,食完飯、浸完溫泉,佢地話嚟個二會!!我哋去咗個客間房飲到點幾!!!!我同個比較後生嘅客頂唔順返咗房瞓先,但其他人就飲到成兩點幾三點瞓,然後第二日六點起!!!!

真心佩服日本人呢方面嘅頑強!!!!

今次整刀嘅人係怪左啲,但係都幾好玩嘅~大佬幾何會無啦啦去整刀,又同個客過夜吹水丫吖~
最後給大家一張我自己整嘅嗰把刀,有啲樣衰唔準笑!!!

 

分享
前一篇文章十套作品八個宙斯的哀嘆
下一篇文章東瀛重口味怪奇展覽
一個普通平凡的香港人,二十五歲時決定隻身遠赴日本工作,目前於鄉郊之地努力奮鬥中,所經歷之事被認為有點慘情(好似係)。並非勵志故事,純屬胡言亂語。

留下回應

輸入你的評論
輸入你的名字